പാലക്കാട് :
നഗരത്തെ ഉത്സവാവേശത്തിൽ ആറാടിക്കാൻ മണപ്പുള്ളിക്കാവ് വേല വ്യാഴാഴ്ച ആഘോഷിക്കും. ആനകളും മേളങ്ങളും തട്ടിന്മേൽക്കൂത്തും വേലയ്ക്ക് നിറം പകരും.
രാവിലെ ക്ഷേത്രത്തിൽ 10ന് കാഴ്ചശീവേലി നടക്കും. കിഴക്കേ യാക്കര മണപ്പുള്ളി ഭഗവതിക്ഷേത്രം, പടിഞ്ഞാറേ യാക്കര വിശ്വേശ്വരക്ഷേത്രം, കൊപ്പം മണപ്പുള്ളി ഭഗവതിക്ഷേത്രം, പടിഞ്ഞാറേ യാക്കര ശ്രീമൂലസ്ഥാനം ക്ഷേത്രം, വടക്കന്തറ മണപ്പുള്ളി ഭഗവതിക്ഷേത്രങ്ങളിൽനിന്ന് വൈകിട്ട് ഗജവീരന്മാരുടെ അകമ്പടിയിൽ ദേശവേലകൾ പാലക്കാട് കോട്ടയ്ക്ക്മുന്നിൽ സംഗമിക്കും.
വേലയോടനുബന്ധിച്ച് പകൽ മൂന്നുമുതൽ രാത്രി ഒമ്പതുവരെ ഗതാഗതക്രമീകരണമുണ്ടാകും.
വ്യാഴാഴ്ച പാലക്കാട് നഗരസഭ, കണ്ണാടി, മരുതറോഡ് പഞ്ചായത്തുകളിൽ കലക്ടർ ഡ്രൈ ഡേ പ്രഖ്യാപിച്ചു. സർക്കാർ, വിദ്യാഭ്യാസ സ്ഥാപനങ്ങൾക്ക് പ്രാദേശിക അവധിയും പ്രഖ്യാപിച്ചിട്ടുണ്ട്. വെള്ളിയാഴ്ച വേലയ്ക്ക് കൊടിയിറങ്ങും.