കവിത
അകമത്രയും
നൊന്തുപൊള്ളുമ്പോഴും
ചിരിച്ചു നിൽക്കുന്ന
ചില ആൺ വന്ദനങ്ങളെ
കണ്ടിട്ടില്ലേ…..
നാളെയുടെ
ആകുലചിന്തകൾ
മനസിനെ കീറി മുറിക്കുമ്പോഴും
തീർത്തും നിസംഗനായി
ആരോടും പകുക്കപെടാതെ
ഏറ്റുവാങ്ങുന്നവൻ ……
കീശയിലെ നോട്ടിൻ്റെ
എണ്ണം കുറഞ്ഞാലും
മക്കളുടെയിഷ്ടങ്ങൾ
അത്യാഗ്രഹങ്ങളാണന്ന്
പറഞ്ഞൊഴിയാത്തവൻ….
കല്യാണ മാമാങ്കങ്ങൾക്കു പുത്തനെടുക്കാൻ
തുണിക്കടയിൽ
കൂട്ടിരിക്കുമ്പോഴും
തനിക്കൊന്നും വേണ്ടാന്ന്
ഭാര്യയോടു വഴക്കിടുന്നവൻ്റെ
മനസറിയാതെ പോകരുത് ….
എല്ലാത്തിലും
തൻ്റെ ചിലവുകൾ
ചുരുക്കി ചുരുക്കി
മറ്റുള്ളവരുടെ മുൻപിൽ ചെറുതാകുന്നവൻ്റെ
വലിയ മനസ്സ്
നിങ്ങളിൽ പലരും
കാണാതെ പോകരുത്….
സൗഹൃദത്തിൽ പോലും
നന്മയൂറുന്ന ചില
ആണകങ്ങളെ
പുണ്യ മനസിൻ പൂവിതളുകളെ നമ്മളാരും തിരിച്ചറിയാതെ പോകരുത് ….
തങ്ങിനിൽക്കും സുഗന്ധം
നുകരാതെ പോകരുത്
സിന്ദു കൃഷ്ണ
