ഒറ്റപ്പാലം∙ സപ്ലൈകോ പീപ്പിൾസ് ബസാറിലെ മോഷണശ്രമം സംബന്ധിച്ച കേസിൽ തൃശൂർ സ്വദേശി അറസ്റ്റിൽ. പാട്ടുരായ്ക്കൽ പള്ളിയാലിൽത്തൊടി വിനോദിനെ (ബെന്നി – 55) ആണ് ഒറ്റപ്പാലം റെയിൽവേ സ്റ്റേഷനിൽ നിന്നു പൊലീസ് അറസ്റ്റ് ചെയ്തത്. നഗരസഭാ ബസ് സ്റ്റാൻഡ് കെട്ടിടത്തിലെ പീപ്പിൾസ് ബസാറിൽ കഴിഞ്ഞ 16നു രാത്രിയായിരുന്നു മോഷണശ്രമം. സ്ഥാപനത്തിലെ ഷട്ടറിന്റെ പൂട്ടും അകത്തെ ചില്ലുവാതിലും തകർത്ത നിലയിലായിരുന്നു. ഓഫിസ് മുറിയിൽ പണം സൂക്ഷിച്ചിരുന്ന ലോക്കറിന്റെ ചെസ്റ്റ് കുത്തിത്തുറക്കാൻ നടത്തിയ ശ്രമമാണു പരാജയപ്പെട്ടത്.
നിരീക്ഷണ ക്യാമറ ദൃശ്യങ്ങൾ കേന്ദ്രീകരിച്ചു പൊലീസ് നടത്തിയ അന്വേഷണമാണു ലക്ഷ്യം കണ്ടത്. കഴിഞ്ഞ ദിവസം രാത്രി റെയിൽവേ സ്റ്റേഷനിൽ നിന്ന് അറസ്റ്റിലായ വിനോദിൽ നിന്നു കത്തി കണ്ടെത്തിയതായി പൊലീസ് അറിയിച്ചു. ഇയാളെ പീപ്പിൾസ് ബസാറിൽ എത്തിച്ചു തെളിവെടുത്തു. തൃശൂർ, മലപ്പുറം ജില്ലകളിലായി വിനോദിന്റെ പേരിൽ ഒട്ടേറെ മോഷണക്കേസുകൾ ഉണ്ടെന്നു പൊലീസ് അറിയിച്ചു. ഒറ്റപ്പാലം ഇൻസ്പെക്ടർ വി. ബാബുരാജൻ, എസ്ഐ പി. ശിവശങ്കരൻ, എഎസ്ഐമാരായ വി.എ. ജോസഫ്, റഷീദ് അലി എന്നിവരുടെ നേതൃത്വത്തിലായിരുന്നു അന്വേഷണം
