പാലക്കാട്: ബസില്‍ കടത്തുകയായിരുന്ന രണ്ട് കിലോ കഞ്ചാവുമായി യുവാവ് അറസ്റ്റില്‍. പെരിന്തല്‍മണ്ണ സ്വദേശി ആഷിഖ് ആണ് അറസ്റ്റിലായത്. പാലക്കാട് എക്‌സൈസ് എന്‍ഫോഴ്‌സ്‌മെന്റ് അസിസ്റ്റന്റ് എക്‌സൈസ് കമ്മീഷണര്‍ രാകേഷിന്റെ നിര്‍ദേശത്തെ തുടര്‍ന്ന് പാലക്കാട് എക്‌സൈസ് സ്‌പെഷ്യല്‍ സ്‌ക്വാഡ് ടീം വാളയാറില്‍ നടത്തിയ വാഹന പരിശോധനയിലാണ് കഞ്ചാവ് പിടികൂടിയത്.
സര്‍ക്കിള്‍ ഇന്‍സ്‌പെക്ടര്‍ സജീവ് എസിന്റെ നേതൃത്വത്തില്‍ ഉള്ള പാലക്കാട് എക്‌സൈസ് സ്പഷ്യല്‍ സ്‌ക്വാഡ് ടീം പാലക്കാട് വാളയാര്‍ ടോള്‍ പ്ലാസയില്‍ വാഹനപരിശോധന നടത്തവേ ബാഗ്ലൂരില്‍ നിന്നും എറണാകുളത്തേക്ക് വരുകയായിരുന്ന ടൂറസ്റ്റ് ബസില്‍ കടത്തുകയായിരുന്ന കഞ്ചാവ് പിടികൂടുകയായിരുന്നു.
ബാഗ്ലൂരില്‍ നിന്നും കഞ്ചാവ് കടത്തി കൊണ്ട് വന്ന് പാലക്കാട്, മലപ്പുറം ജില്ലകളിലെ കഞ്ചാവ് വില്‍പനക്കാര്‍ക്ക് എത്തിക്കുകയാണെന്ന് എക്‌സൈസ് അധികൃതര്‍ അറിയിച്ചു. പിടികൂടിയ കഞ്ചാവിനു ചില്ലറ വിപണിയില്‍ ഒരുലക്ഷത്തോളം വിലവരും. പ്രതിയേയും കഞ്ചാവും, മറ്റും കസ്റ്റഡിയില്‍ എടുത്തു.
പ്രിവന്റീവ് ഓഫിസര്‍മാരായ എ ജയപ്രകാശന്‍, ആര്‍ എസ് സുരേഷ്, സിഇഒമാരായ കെ ജ്ഞാനകുമാര്‍, കെ ഹരിപ്രസാദ്, ഡി സുഭാഷ്, ആര്‍ അനൂപ്, വിഷ്ണു സി എന്നിവര്‍ പരിശോധനയില്‍ പങ്കെടുത്തു.
