വോട്ടർ ഐഡിയുമായി ആധാർ ബന്ധിപ്പിക്കുന്നത് വോട്ടർ പട്ടികയിൽ കൃത്രിമം കാണിക്കാൻ കാരണമാകും; തീരുമാനം പിൻവലിക്കണം:
പാലക്കാട് :ആധാർ കാർഡുകൾ വോട്ടർ ഐഡിയുമായി ബന്ധിപ്പിക്കാനുള്ള തീരുമാനം പിൻവലിക്കണമെന്ന് പോപുലർ ഫ്രണ്ട് ഓഫ് ഇന്ത്യ ചെയർമാൻ ഒ എം എ സലാം. അടുത്തിടെ പാസാക്കിയ തിരഞ്ഞെടുപ്പ് നിയമ ഭേദഗതി ബില്ലിലെ വോട്ടർ ഐഡി ആധാറുമായി ബന്ധിപ്പിക്കുന്നതിനുള്ള നിർദ്ദേശം ഗുരുതരമായ നിരവധി ആശങ്കകൾ ഉയർത്തുന്നുണ്ട്. പൊതുവിതരണ പദ്ധതിക്ക് അല്ലാതെ മറ്റ് ആവശ്യങ്ങൾക്ക് ആധാർ ഉപയോഗിക്കുന്നത് നിരോധിച്ചുകൊണ്ട് എല്ലാ പൗരന്മാർക്കും ആധാർ നിർബന്ധമാക്കുമെന്ന 2015ലെ സുപ്രിംകോടതി ഉത്തരവിന് വിരുദ്ധമാണ് ഈ പരിഷ്കാരം. പുതിയ തീരുമാനം സ്വകാര്യതയെന്ന മൗലികാവകാശത്തെയും വെല്ലുവിളിക്കുന്നതാണ്. അധികാരം കൈയ്യാളുന്നവർ തങ്ങൾക്കെതിരായി വരുമെന്ന് ഭയപ്പെടുന്നവരെ ഒഴിവാക്കിക്കൊണ്ട് വോട്ടർ പട്ടികയിൽ കൃത്രിമം കാണിക്കാൻ ഡാറ്റ ദുരുപയോഗം ചെയ്യാനുള്ള സാധ്യതയുമേറെയാണ്.
കഴിഞ്ഞ സെൻസസ് പ്രകാരം ഇന്ത്യയുടെ സാക്ഷരതാ നിരക്ക് 73 ശതമാനം മാത്രമാണ്. ഡിജിറ്റൽ ഇന്ത്യ എന്ന് വിളിക്കപ്പെടുന്ന ഇന്ത്യ ഇപ്പോഴും ഭൂരിപക്ഷം ഇന്ത്യക്കാർക്കും അപ്രാപ്യമാണ്. വോട്ടെടുപ്പ് പ്രക്രിയ ഡിജിറ്റലൈസ് ചെയ്യുമെന്ന വ്യാജേന ആധാറിനെ വോട്ടർ ഐഡിയുമായി ബന്ധിപ്പിക്കുന്ന ഈ പ്രക്രിയ രാജ്യത്തെ പാർശ്വവൽക്കരിക്കപ്പെട്ട വലിയൊരു വിഭാഗത്തെ ജനാധിപത്യ പ്രക്രിയയിൽ നിന്ന് പുറത്താക്കും. കേന്ദ്രം ഉടൻ തീരുമാനം പിൻവലിക്കണമെന്നും പോപുലർ ഫ്രണ്ട് ആവശ്യപ്പെടുന്നു.
