തച്ചമ്പാറയിലെ സ്റ്റേറ്റ് ബാങ്ക് ഓഫ് ഇന്ത്യയുടെ എടിഎമ്മിനു തീവെച്ച ആളെ കല്ലടിക്കോട് പൊലീസ് പിടികൂടി
പാലക്കാട് : തച്ചമ്പാറയിലെ സ്റ്റേറ്റ് ബാങ്ക് ഓഫ് ഇന്ത്യയുടെ എടിഎമ്മിനു തീവെച്ച ആളെ കല്ലടിക്കോട് പൊലീസ് പിടികൂടി . മണ്ണാർക്കാട് മൈലാംപാടം സ്വദേശി മുഹമ്മദ് റഫീഖ് ( 30 ) ആണ് പിടിയിലായത് . ഇയാൾക്ക് മാനസികാസ്വാസ്ഥ്യമുണ്ട് . കോടതിയിൽ ഹാജരാക്കിയ ശേഷം യുവാവിനെ തൃശ്ശൂരിലെ സർക്കാർ മാനസികാരോഗ്യ കേന്ദ്രത്തിലാക്കിയതായി കല്ലടിക്കോട് പൊലീസ് അറിയിച്ചു . വെള്ളിയാഴ്ച പുലർച്ചെ നാലു മണിയോടെയാണ് യുവാവ് എടിഎം കൗണ്ടറിലെത്തി മെഷീന് തീയിട്ടത് . കത്തിച്ച ശേഷം യുവാവ് പുറത്തേക്ക് ഇറങ്ങി പോവുകയായിരുന്നു . കീപാഡ് പൂർണമായും ഉരുകി നശിച്ചു . വേസ്റ്റ് ബിന്നിലുണ്ടായിരുന്ന പേപ്പറുകൾ കീപാഡിനു മുകളിൽ വെച്ച് കത്തിക്കുന്ന ദൃശ്യങ്ങൾ സിസിടിവിയിൽ പതിഞ്ഞിരുന്നു . തുടർന്ന് നടത്തിയ അന്വേഷണത്തിലാണ് യുവാവിനെ പൊലീസ് കണ്ടെത്തിയത് .
