അസമിലെ ദറങ് ജില്ലയില്‍ ബിജെപി ഭരണകൂടം പോലിസിനെ ഉപയോഗിച്ച് ഗ്രാമീണര്‍ക്കുനേരെ നടത്തിയ നരനായാട്ടിൽ പ്രതിഷേധിച്ചു പോപുലർ ഫ്രണ്ട് ഓഫ് ഇന്ത്യ ഒറ്റപ്പാലം ഡിവിഷൻ കമ്മിറ്റി ഒറ്റപ്പാലം ടൗണിൽ പ്രധിഷേധ പ്രകടനം നടത്തി.
പതിറ്റാണ്ടുകളായി തങ്ങള്‍ താമസിക്കുന്ന ഭൂമിയില്‍ നിന്ന് ബലമായി ഒഴിപ്പിക്കുന്നതിനെതിരെ പ്രതിഷേധിച്ച ഗ്രാമീണര്‍ക്കുനേരെ കാര്യമായ പ്രകോപനമൊന്നുമില്ലാതെയാണ് പോലിസ് വെടിവെച്ചത്. മനുഷ്യത്വരഹിതമായ കുടിയൊഴിപ്പിക്കല്‍ അവസാനിപ്പിക്കുകയും
നരനായാട്ട് നടത്തിയ ഉദ്യോഗസ്ഥര്‍ക്കെതിരെ നടപടിയെടുക്കുകയും വേണമെന്ന് പോപുലർ ഫ്രണ്ട് ഒറ്റപ്പാലം ഡിവിഷൻ പ്രസിഡന്റ് മരയ്ക്കാർ വരോട് ആവശ്യപ്പെട്ടു.
പ്രദേശത്തെ 800ഓളം മുസ്ലിം കുടുംബങ്ങളെയാണ് അനധികൃത ഭൂമി കൈയേറ്റം ആരോപിച്ച് സംസ്ഥാന സര്‍ക്കാര്‍ കുടിയൊഴിപ്പിച്ചത്. ഇപ്പോഴും കുടിയൊഴിപ്പിക്കല്‍ തുടരുകയാണ്. ഇവരെ ബംഗ്ലാദേശില്‍ നിന്നുള്ള അനധികൃത കുടിയേറ്റക്കാരായി ചിത്രീകരിച്ച് പൗരത്വം ഇല്ലാതാക്കാനുള്ള ശ്രമത്തിന്റെ ഭാഗമാണിത്. ബിജെപി ഭരിക്കുന്ന സംസ്ഥാനങ്ങളില്‍ ജനങ്ങളെ മതത്തിന്റെ പേരില്‍ ധ്രുവീകരിക്കുകയും കൊല്ലുകയും ചെയ്യുന്നതിന്റെ ഏറ്റവും പുതിയ ഉദാഹരണമാണിതെന്നും, അസം ഭരണകൂടത്തിന്റെ ക്രൂരവും പൈശാചികവുമായ നടപടിക്കെതിരെ രാജ്യവ്യാപകമായി പ്രതിഷേധങ്ങള്‍ ഉയര്‍ന്നുവരണമെന്നും മരയ്ക്കാർ വരോട് കൂട്ടിച്ചേർത്തു.
പ്രതിഷേധ പ്രകടനത്തിന് ഡിവിഷൻ പ്രസിഡന്റ് മരയ്ക്കാർ വരോട്, ഡിവിഷൻ സെക്രട്ടറി മജീദ് അമ്പലപ്പാറ, ഒറ്റപ്പാലം ഏരിയ പ്രസിഡന്റ് സുബൈർ ഒറ്റപ്പാലം എന്നിവർ നേതൃത്വം കൊടുത്തു.
