പാലക്കാട്: ഡെങ്കിപ്പനി ബാധിച്ച് പാലക്കാട് നെമ്മാറ അവൈറ്റിസ് ആശുപത്രിയിൽ ചികിത്സയിൽ കഴിഞ്ഞിരുന്ന ചലച്ചിത്ര നിർമ്മാതാവും നടിയുമായ സാന്ദ്ര തോമസ് ആശുപത്രി വിട്ടു. കുറഞ്ഞ രക്തസമ്മർദ്ദത്തെയും ഹൃദയമിടിപ്പിനെയും തുടർന്നാണ് സാന്ദ്ര തോമസിനെ കഴിഞ്ഞ ആഴ്ച അവൈറ്റിസ് ആശുപത്രിയിൽ പ്രവേശിപ്പിച്ചത്. പരിശോധനയിൽ ഡെങ്കിപ്പനി സ്ഥിരീകരിച്ചതു മൂലം, സാന്ദ്ര ഏതാനും ദിവസം ഐ.സി.യുവിൽ ചികിത്സയിൽ ആയിരുന്നു. പിന്നീട്, ഹൃദയമിടിപ്പും രക്തസമ്മർദ്ദവും സാധാരണസ്ഥിതിയിലേക്ക് എത്തുകയും ആരോഗ്യസ്ഥിതി മെച്ചപ്പെട്ടുവരുകയുമായിരുന്നു.
ഡോ. രഞ്ജിത്ത് എം.എസിന്റെ (ഫിസിഷ്യൻ-ഇന്റേനൽ മെഡിസിൻ ) കീഴിലുള്ള സംഘമാണ് ചികിത്സയ്ക്ക് നേതൃത്വം നൽകിയത്. പൂർണ ആരോഗ്യവതി ആയിട്ടാണ് സാന്ദ്ര ആശുപത്രി വിട്ടതെന്ന് ആശുപത്രി അധികൃതർ അറിയിച്ചു.