ലക്ഷദ്വീപിനെ തകർക്കരുത്‌ എൽഡിഎഫ് ‌പ്രതിഷേധം നാളെ

പാലക്കാട്‌
ലക്ഷദ്വീപിനെ ഹിന്ദുത്വ പരീക്ഷണശാലയാക്കാനുള്ള കേന്ദ്ര ബിജെപി സർക്കാർ ശ്രമങ്ങൾക്കെതിരെ എൽഡിഎഫ്‌ നേതൃത്വത്തിൽ മൂന്നിന്‌ പ്രതിഷേധം സംഘടിപ്പിക്കും. ലക്ഷദ്വീപ്‌ ജനതയുടെ സംസ്‌കാരവും ജീവിതവും തകർത്ത്‌ സംഘപരിവാർ അജൻഡ നടപ്പാക്കാനുള്ള തീവ്രശ്രമത്തിലാണ്‌ അഡ്‌മിനിസ്‌ട്രേറ്റർ പ്രഫുൽ ഖോഡ പട്ടേൽ.  
ലക്ഷദ്വീപ്‌ ജനതയുടെ എല്ലാ അവകാശവും ചവിട്ടിമെതിച്ചാണ്‌ പ്രധാനമന്ത്രിയുടെയും അമിത്‌ ഷായുടെയും നോമിനിയായ  പ്രഫുൽ ഖോഡ പട്ടേൽ ജനാധിപത്യം അട്ടിമറിക്കുന്നത്‌. ഇതിനെതിരെ കേരള നിയമസഭ തിങ്കളാഴ്‌ച പ്രമേയം പാസാക്കി. 
ഒരു ജനതയുടെ സ്വാതന്ത്ര്യവും അവകാശങ്ങളും ഇല്ലാതാക്കുന്ന കിരാത നിയമങ്ങൾ പിൻവലിക്കണമെന്നും അഡ്‌മിനിസ്‌ട്രേറ്ററെ മാറ്റണമെന്നും ആവശ്യപ്പെട്ടാണ്‌ എൽഡിഎഫ്‌ നേതൃത്വത്തിൽ വ്യാഴാഴ്‌ച സംസ്ഥാന വ്യാപകമായി കേന്ദ്ര സർക്കാർ ഓഫീസുകൾക്കു മുന്നിൽ പ്രതിഷേധം സംഘടിപ്പിക്കുന്നത്‌. ലോക്കൽ, പഞ്ചായത്ത്‌ അടിസ്ഥാനത്തിൽ കോവിഡ്‌ മാനദണ്ഡം പാലിച്ചാണ്‌ സമരം. ജനാധിപത്യ ഫെഡറൽ സംവിധാനങ്ങൾ അട്ടിമറിക്കുന്ന ബിജെപി സർക്കാർ നടപടിക്കെതിരായ സമരം വിജയിപ്പിക്കണമെന്ന്‌ എൽഡിഎഫ്‌ ജില്ലാ കമ്മിറ്റി അഭ്യർഥിച്ചു