പാലക്കാട്: ഇന്ധനത്തിന്റെയും പാചകവാതകത്തിന്റെയും വിലവർധനക്കെതിരേ വാഹനംതള്ളി കോൺഗ്രസ് ജില്ലാകമ്മിറ്റിയുടെ പ്രതിഷേധം. ഇന്ധനവില നിയന്ത്രിക്കണമെന്നാവശ്യപ്പെട്ട് കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രൻ തിരുവനന്തപുരത്ത് നടത്തുന്ന ഉപവാസസമരത്തിന് ഐക്യദാർഢ്യം പ്രഖ്യാപിച്ചാണ് ജില്ലയിലും പ്രതിഷേധപരിപാടി സംഘടിപ്പിച്ചത്.
ഡി.സി.സി. ഓഫീസിൽനിന്ന് സ്കൂട്ടറും പാചകവാതക സിലിൻഡറും ഉന്തുവണ്ടിയിൽക്കയറ്റി സ്റ്റേഡിയംസ്റ്റാൻഡ് വരെ തള്ളിക്കൊണ്ടുപോയാണ് കോൺഗ്രസ് പ്രതിഷേധിച്ചത്. പ്രവർത്തകർ സ്കൂട്ടർ തള്ളിയും സമരത്തിൽ അണിചേർന്നു. സ്റ്റേഡിയം സ്റ്റാൻഡ് പരിസരത്തുനടന്ന പ്രതിഷേധയോഗം ഡി.സി.സി. പ്രസിഡന്റ് വി.കെ. ശ്രീകണ്ഠൻ എം.പി. ഉദ്ഘാടനംചെയ്തു. കെ.പി.സി.സി. ജനറൽ സെക്രട്ടറി സി. ചന്ദ്രൻ, സെക്രട്ടറി പി. ബാലഗോപാൽ, ഡി.സി.സി. ജനറൽസെക്രട്ടറിമാരായ സി. ബാലൻ, കെ. ശിവരാജൻ, ബ്ലോക്ക് കോൺഗ്രസ് പ്രസിഡന്റുമാരായ പുത്തൂർ രാമകൃഷ്ണൻ, പി.ആർ. പ്രസാദ് തുടങ്ങിയവർ നേതൃത്വംനൽകി.
