പട്ടാമ്പിയിലും എൽ.ഡി.എഫ് ഭരണത്തിലേക്ക്
പാലക്കാട്: ജില്ലയിലെ യു.ഡി.എഫ് ശക്തികേന്ദ്രമെന്ന് വിശേഷിപ്പിക്കുന്ന പട്ടാമ്പിയിലും എൽ.ഡി.എഫ് അധികാരത്തിലേക്ക്. എൽ.ഡി.എഫിനെ പിന്തുണക്കുമെന്ന് വി ഫോർ പട്ടാമ്പി നേതാവ് ടി.പി ഷാജി പറഞ്ഞു. കോൺഗ്രസിൽ നിന്ന് വിഘടിച്ചാണ് ടി.പി ഷാജിയുടെ നേതൃത്വത്തിൽ വി ഫോർ പട്ടാമ്പി കൂട്ടായ്മ രൂപീകരിച്ചത്. മൽസരിച്ച ആറ് സീറ്റുകളിലും വിഫോർ പട്ടാമ്പി വിജയിച്ചിരുന്നു.
കോൺഗ്രസിനെ പിന്തുണക്കാൻ തനിക്ക് കഴിയില്ലെന്നും മുൻ കെ.പി.സി.സി അംഗം കൂടിയായ ടി.പി ഷാജി വ്യക്തമാക്കി. പട്ടാമ്പിയിലെ യു.ഡി.എഫിൻെറ പരാജയത്തിന് കാരണം മുൻ എം.എൽ.എ സി.പി മുഹമ്മദും പാലക്കാട് എം.പി വി.കെ ശ്രീകണ്ഠനുമാണെന്നും അദ്ദേഹം ആരോപിച്ചു.
28 അംഗ നഗരസഭയിൽ എഴ് സീറ്റുകളിലാണ് എൽ.ഡി.എഫ് ജയിച്ചത്. യു.ഡി.എഫ് 11 സീറ്റിലും എൻ.ഡി.എ രണ്ട് സീറ്റിലും മറ്റുള്ളവർ എട്ട് സീറ്റിലും ജയിച്ചിട്ടുണ്ട്
