സോജനെ സംരക്ഷിക്കുന്ന സര്ക്കാരിനെതിരെ അമ്മമാരുടെ അനിശ്ചിതകാല സമരപ്രഖ്യാപനം ഡിസംബര് 15 ന്
പാലക്കാട്: വാളയാര് പെണ്കുട്ടികളെ പീഡിപ്പിച്ചു കൊലപ്പെടുത്തിയ കേസിലെ പ്രതികളെ സംരക്ഷിച്ച സോജനടക്കമുള്ള പോലീസ് ഉദ്യോഗസ്ഥരെ സംരക്ഷിക്കുന്ന സര്ക്കാരിനെതിരെ സോജന്റെ ഇരകളായ മൂന്നു അമ്മമാര് അനിശ്ചിത കാല സമരത്തിലേക്ക്. ഡിസംബര് 15 ന് രാവിലെ പത്ത് മണി മുതല് വൈകീട്ട് അഞ്ചുമണിവരെ പാലക്കാട് അഞ്ചുവിളക്കില് വെച്ച് ചേരുന്ന പൊതുസമ്മേളനത്തില് സമരത്തിന്റെ പ്രഖ്യാപനം നടത്തും. സോജന് ചവിട്ടിക്കൊന്ന കുന്നംകുളത്തെ നാരായണന് നായരുടെ ഭാര്യ വത്സല, വാളയാര് കേസില് പ്രതിയാക്കാന് നിര്ബന്ധിച്ചത് മൂലം ആത്മഹത്യ ചെയ്ത പ്രവീണിന്റെ മാതാവ് റാണി മരിയ, എന്നിവര്ക്കൊപ്പം വാളയാര് പെണ്കുട്ടികളുടെ മാതാവും ചേര്ന്നാണ് സമരം നടത്തുന്നത് എന്ന് സമരസമിതി ഭാരവാഹികള് പത്രസമ്മേളനത്തില് അറിയിച്ചു.
2001 സെപ്റ്റംബറില് കൊല ചെയ്യപ്പെട്ട നാരായണന് നായരുടെ കുടുംബം നീതി തേടി രണ്ട് പതിറ്റാണ്ടായി അലയുകയാണ്. മാറി മാറി വന്ന സര്ക്കാരുകളും ഉന്നത പോലീസ് ഉദ്യോഗസ്ഥരും നല്കുന്ന സംരക്ഷണം ഇല്ലായിരുന്നെങ്കില് ഇപ്പോള് കൊലക്കുറ്റത്തിന് ശിക്ഷ ലഭിക്കേണ്ട വ്യക്തിയാണ് സോജന്. ഈ കൊലക്കു നഷ്ടപരിഹാരമായി സംസ്ഥാന മനുഷ്യാവകാശ കമ്മീഷന് വിധിച്ച അന്പതിനായിരം രൂപ സോജന് നല്കുകയും ചെയ്തിട്ടുണ്ടെന്ന് അവര് ചൂണ്ടിക്കാട്ടി.
കേസ് അന്വേഷണം അട്ടിമറിച്ച സോജന് അടക്കമുള്ള പോലീസ് ഉദ്യോഗസ്ഥരെ പ്രതികളാക്കി ക്രിമിനല് കേസ് എടുക്കാന് സര്ക്കാര് തയ്യാറാകണമെന്നും ഒരു ക്രിമിനല് ആയ ആളെ പോലീസ് സേനയില് നിരന്തരം സ്ഥാനക്കയറ്റം നല്കി സംരക്ഷിക്കുന്ന സര്ക്കാരിന്റെ നിലപാടിനെതിരെയാണ് സമരം പ്രഖ്യാപിക്കുന്നതെന്നും അവര് പറഞ്ഞു.
നിരവധി രാഷ്ട്രീയ- സാമൂഹ്യ-സാംസ്കാരിക നേതാക്കള് സമ്മേളനത്തില് പങ്കെടുക്കും.
വാളയാര് നീതി സമരസമിതി ഭാരവാഹികളായ വിളയോടി വേണുഗോപാല്, വി എം മാഴ്സണ് , സി ആര് നീലകണ്ഠന് എന്നിവര് പത്രസമ്മേളനത്തില് പങ്കെടുത്തു.