നെന്മാറ; വിത്തനശ്ശേരിയിലെ VFPCK (വെജിറ്റബിൾസ് ആൻ്റ് ഫ്രൂട്ട്സ് പ്രമോഷൻ കൗൺസിൽ ഓഫ് കേരള) യിലെ വിപണനം സജീവമാകുമ്പോൾ പച്ചക്കറി കൃഷിയിടങ്ങളിൽ പണിയെടുക്കുന്ന കർഷക മനസ്സുകൾക്ക് ആശ്വാസമാവുകയാണ്. കൃഷിയിറക്കുന്ന സമയത്ത് മഴ വിട്ടുനിന്നത് ഈ മേഖലയിലെ കർഷകരുടെ അദ്ധ്വാനഭാരം വർദ്ധിപ്പിക്കാൻ കാരണമായെങ്കിലും വിളവെടുപ്പ് സജീവമായ സമയത്ത് പാവലിന് നാല്പതുരൂപവരെ ലഭിച്ചത് കർഷകർക്ക് ആശ്വാസമായി. പടവലം, പീച്ചിൽ,പയർ, കോവക്ക, കുമ്പളം, മത്തൻ, പീച്ചിങ്ങ, മുളക്, വെണ്ട, വഴുതന എന്നിവയാണ് ഇവിടെ പ്രധാനമായും വിപണനം നടക്കുന്നത്. ഗുണമേന്മയേറിയ അരിമുളക് എന്നറിയപ്പെടുന്ന വെള്ളമുളക് വിത്തനശ്ശേരിയിലെ പേരുകേട്ട ഒരിനമാണ്. ഇതിന് ഈ സീസൺ ആരംഭത്തിൽ ഇവിടെ ഒരു കിലോവിന് 400 രൂപ ലഭിച്ചിരുന്നു. 15മുതൽ 25വരെ പച്ചക്കറി കൃഷി ചെയ്യുന്ന കർഷകരുള്ള പതിനൊന്ന് ഗ്രൂപ്പുകളിലായി മുന്നൂറിലധികം കർഷകർ “വിത്തനശ്ശേരി സ്വാശ്രയ കർഷകസമിതി” എന്ന ഈ സംഘത്തിലുണ്ട്.
ഈ സംഘത്തിലുള്ളവർക്കുപുറമെ മെമ്പർഷിപ്പില്ലാത്ത എൺപതിലധികം കർഷകരും ഈ സ്ഥാപനത്തിലൂടെ വിപണനം നടത്തുന്നുണ്ട്.
*കോവിഡിൻ്റെ പശ്ചാത്തലത്തിൽ മറ്റു ജില്ലകളിലേക്ക് പച്ചക്കറി കൊണ്ടു പോകുന്നതിനായി വരുന്ന വാഹനങ്ങളുടെ കുറവ് കർഷകമനസ്സുകളിൽ ആശങ്കയുളവാക്കിയിരുന്നു. എന്നാൽ ഇപ്പോൾ വിപണനത്തിന് പുരോഗതിയുണ്ടെന്ന് കർഷകർ പറയുന്നു.
കർഷകരുടെ കടബാധ്യതകൾ വിപണനകേന്ദ്രത്തിലെ വ്യാപാരവുമായി ബന്ധപ്പെട്ടിരിക്കുന്നു.
ഇവിടെ എല്ലാവർക്കും ഒരേ വിലയ്ക്ക് പച്ചക്കറികൾ ലഭിക്കുന്നു.(ഹോൾസെയിൽ & റീട്ടെയിൽ) എന്നതാണ് “വിത്തനശ്ശേരി സ്വാശ്രയ കർഷകസമിതിയുടെ പ്രത്യേകത.”
വിൽക്കുന്ന വിലയുടെ 5% സ്വാശ്രയകർഷക സമിതിയിലേക്ക് എടുക്കുന്നു. ബാക്കി സംഖ്യ വിറ്റതിൻ്റെ രണ്ടാമത്തെ ദിവസം കർഷകർക്ക് നൽകുന്നു.
സമിതി കമ്മീഷൻ വകയിൽ എടുക്കുന്ന 5% സംഖ്യയിൽ നിന്നും.,2% സംഖ്യ കർഷകർ നൽകിയ തൂക്കത്തിനും,വിലക്കും ആനുപാതികമായി കർഷകർക്ക് ഉത്സവബത്ത എന്നരീതിയിൽ സഹായധനമായി നൽകുന്നു.
കമ്മീഷൻ വരുമാനത്തിലെ ബാക്കി 3% വിത്തനശ്ശേരി സ്വാശ്രയ കർഷകസമിതിയുടെ ഓഫീസ് ചിലവുകൾക്കും, ജോലിക്കാരുടെ ശമ്പളത്തിനുമായി ഉപയോഗിക്കുന്നു.
ഇവിടെ നിന്നും ഒന്നാംതരം ഗുണനിലവാരമുള്ള പച്ചക്കറികൾ മാത്രമേ മാർക്കറ്റ് വിലക്ക് വിപണനം ചെയ്യുകയുള്ളൂ.
നിലവാരം കുറഞ്ഞ പച്ചക്കറികൾ/നീക്കം ചെയ്യപ്പെട്ടവ കുറഞ്ഞവിലയ്ക്ക് വഴിയോരക്കച്ചവടക്കാരും മറ്റും കുറഞ്ഞവിലയ്ക്ക് വാങ്ങികച്ചവടം നടത്തുന്നു.
വെള്ളറ രാജൻ. പ്രസിഡൻ്റായുള്ള വിത്തനശ്ശേരി സ്വാശ്രയ കർഷകസമിതിയിൽ മറ്റു പതിനഞ്ച് കാര്യനിർവ്വഹണ മെമ്പർമാരും ഉണ്ട്.
ഈ സ്ഥാപനത്തിന് അയിലൂർ, പുത്തൻ തറയിൽ പ്രവർത്തിക്കുന്ന ഒരു ശാഖ കൂടിയുണ്ട്. 2019-2020 വർഷം 855 ടൺ പച്ചക്കറികളാണ് വിപണനം നടന്നതെന്നും, 2020-2021 വർഷത്തിൽ കഴിഞ്ഞദിവസം വരെ 926 ടൺ പച്ചക്കറികൾ കയറ്റി അയച്ചിരുന്നു എന്നും VFPCK വിത്തനശ്ശേരിയുടെ ഭാരവാഹികൾ പറയുന്നു. കേരളത്തിലെ എല്ലാ ജില്ലകളിലേക്കും ഇവിടെനിന്നും പച്ചക്കറികൾ കയറ്റിയയക്കുന്നു. ഞായറാഴ്ച മിക്ക മാർക്കറ്റുകളും അവധിദിവസം ആകുന്നതിനാൽ ശനിയാഴ്ച ദിവസം ഇവിടെ വിത്തനശ്ശേരി സ്വാശ്രയ വിപണിയിൽ അവധി ദിവസമാണ്.