പാലക്കാട്:കോവിഡ് പ്രതിരോധ പ്രവർത്തനങ്ങളിലെ മുന്നണിപ്പോരാളികളായ ആരോഗ്യ പ്രവർത്തകർക്ക് ഫ്രറ്റേണിറ്റി മൂവ്മെൻ്റ് പരിസ്ഥിതി ദിനത്തോടനുബന്ധിച്ച് ഫലവൃക്ഷ തൈകൾ സമ്മാനിച്ച് അവ നട്ടുപിടിപ്പിച്ചു.ജില്ല കമ്മിറ്റിക്ക് കീഴിൽ ജില്ല ആശുപത്രി സൂപ്രണ്ട് ഡോ.രമാദേവി,പാലക്കാട് ഗവ.മെഡിക്കൽ കോളേജ് അസി.പ്രൊഫസർ അഭി കബീർ എന്നിവർക്ക് ഫലവൃക്ഷ തൈകൾ നൽകി സ്ഥാപനങ്ങളിൽ അവ നട്ടുപിടിപ്പിച്ചു.പ്രവർത്തകർ വീടുകളിൽ തൈകൾ നട്ടതിന് പുറമെ പൊതു സ്ഥലങ്ങൾ,ആശുപത്രികൾ,സ്ക്കൂളുകൾ എന്നിവിടങ്ങളിലും ജില്ലയിലുടനീളം തൈകൾ വെച്ചുപിടിപ്പിച്ചു.ജനപ്രതിനിധികൾ,സാമൂഹ്യ പ്രവർത്തകർ,പരിസ്ഥിതി പ്രവർത്തകർ,ആരോഗ്യ പ്രവർത്തകർ,അധ്യാപകർ,മറ്റു പ്രൊഫഷണലുകൾ എന്നിവരെല്ലാം ഫ്രറ്റേണിറ്റിയുടെ പരിസ്ഥിതി ദിന പരിപാടികളിൽ പങ്കാളികളായി.ഫലവൃക്ഷ തൈകളുടെ വിതരണത്തിനായി മണ്ഡലങ്ങളിലൂടെ ഫ്രറ്റേണിറ്റിയുടെ ‘സാഹോദര്യ മരം’ വിതരണ വാഹനം പര്യടനം നടത്തി.
പരിസര ശുചീകരണം,അണു നശീകരണം,ഓവുചാൽ വൃത്തിയാക്കൽ,പ്ലാസ്റ്റിക്ക് ശേഖരണം തുടങ്ങിയ പ്രവർത്തനങ്ങളും ഫ്രറ്റേണിറ്റിക്ക് കീഴിൽ നടന്നു.കാമ്പസ് യൂണിറ്റുകൾക്ക് കീഴിലും വിപുലമായ പരിപാടികൾ നടന്നു.ആവാസ വ്യവസ്ഥയുടെ സന്തുലിതാവസ്ഥ നിലനിർത്തുന്നതിനായി നട്ടുപിടിപ്പിക്കുന്ന തൈകൾ സംരക്ഷിക്കുകയെന്ന ലക്ഷ്യത്തിൽ ഫ്രറ്റേണിറ്റി ജില്ല കമ്മിറ്റി ഒരു വർഷത്തെ വൃക്ഷ തൈ പരിപാലന മത്സരവും സംഘടിപ്പിച്ചിട്ടുണ്ട്.ഈ വർഷം പരിസ്ഥിതി ദിനത്തിൽ തൈ നട്ട് അടുത്ത വർഷത്തെ പരിസ്ഥിതി ദിനം വരെ തൈ മികച്ച രീതിയിൽ പരിപാലിക്കുന്നവരെ ആദരിക്കുന്നതാണ് മത്സരം.
പരിപാടികൾക്ക് ജില്ല,മണ്ഡലം,കാമ്പസ് യൂണിറ്റ് നേതാകൾ നേതൃത്വം നൽകി.
Photo:പരിസ്ഥിതി ദിനത്തോടനുബന്ധിച്ച് ഫ്രറ്റേണിറ്റി നേതാക്കൾ ജില്ല ആശുപത്രി സൂപ്രണ്ട് ഡോ.രമാദേവിക്ക് ഫലവൃക്ഷ തൈകൾ സമ്മാനിക്കുന്നു.
