നെന്മാറ. വിത്തനശ്ശേരി വായനശാല – കവളപ്പാറ റോഡിൽ അയ്യപ്പൻകാവിനു മുൻവശത്തുള്ള റോഡ് തകർന്ന് ഗതാഗതം തടസ്സപ്പെട്ടു. സമീപത്തുള്ള കുളത്തിലെ വെള്ളത്തിന്റെ ജലനിരപ്പ് ഉയർന്നതുമൂലമുണ്ടായ ഒഴുക്ക് കുളത്തിനരികിലുള്ള റോഡിന്റെ തകർച്ചക്ക് കാരണമായി. ഈ പ്രദേശത്തെ വാർഡ് മെമ്പർമാർ സംയുക്തമായി ഈ സംഭവം പഞ്ചായത്തിൽ അറിയിച്ചതിനെത്തുടർന്ന് ഓവർസിയർ ശ്രീധരൻ, മെമ്പർമാരായ, സുനിതസുകുമാരൻ(വാർഡ്- 5), സുഭജ(വാർഡ്-6), മോഹനൻ(വാർഡ്-7) എന്നിവരോടൊപ്പം സംഭവസ്ഥലം സന്ദർശിച്ചു. ഈ കാലാവസ്ഥയും കുളത്തിലെ വെള്ളവും കൾവർട്ട് നിർമ്മാണത്തിന് അനുയോജ്യമല്ലാത്തതിനാൽ താത്കാലികമായി പൈപ്പുകൾ നിരത്തി വെള്ളം ഒഴിയാനുള്ള ക്രമീകരണങ്ങൾ ചെയ്ത് ക്വാറി വേസ്റ്റ് മുതലായവ ഉപയോഗിച്ച് ഗതാഗതം പുനഃസ്ഥാപിക്കാനുള്ള സത്വര നടപടികൾ കൈക്കൊള്ളണമെന്നും തീരുമാനിച്ചു. ഈ റോഡിന്റെ തകർച്ച അനവധി പച്ചക്കറി കർഷകർക്ക് വിഷമത സൃഷ്ഠിച്ചിരിക്കുകയാണ്. കൂടല്ലൂർ, കവളപ്പാറ,കൊശിനിപ്പള്ളം,ചാണ്ടിച്ചാല എന്നിവിടങ്ങളിലെ കർഷകർ ഇതുവഴിയാണ് സ്വാശ്രയ സമിതിയിലേക്ക് പച്ചക്കറികൾ വാഹനങ്ങളിൽ എത്തിക്കാറുള്ളത്.