പാലക്കാട്: എം ഇ എസ് പ്രസിഡണ്ടായി ആറാം തവണയും തിരഞ്ഞെടുക്കപ്പെട്ട ഡോക്ടർ പി എ ഫസൽ ഗഫൂറിന് ജൂൺ 13ന് തിങ്കളാഴ്ച വൈകിട്ട് മൂന്ന് മണിക്ക് പാലക്കാട് മേഴ്സി കോളേജ് ജംഗ്ഷനു സമീപത്തുള്ള പ്രസന്ന ലക്ഷ്മി ഓഡിറ്റോറിയത്തിൽ വെച്ച് സ്വീകരണം നൽകും.
കഴിഞ്ഞ 22 വർഷമായി എംഇഎസ് ജനറൽ സെക്രട്ടറി, പ്രസിഡൻറ് പദവികൾ വഹിച്ചു വരികയാണ് ഫസൽ ഗഫൂർ. 15 വർഷം എം ഇ എസ് പ്രസിഡന്റ് ആയിരുന്നു.
സ്വീകരണ പരിപാടി സംസ്ഥാന വൈദ്യുതി വകുപ്പ് മന്ത്രി കെ കൃഷ്ണൻകുട്ടി ഉദ്ഘാടനം ചെയ്യും. എംപിമാരായ വി കെ ശ്രീകണ്ഠനും രമ്യ ഹരിദാസും മുഖ്യപ്രഭാഷണം നടത്തും.
ചടങ്ങിൽ ജില്ലയിൽനിന്ന് എംഇഎസ് സംസ്ഥാന നേതൃത്വത്തിലേക്ക് തെരഞ്ഞെടുക്കപ്പെട്ട സംസ്ഥാന സെക്രട്ടറിമാരായ എ. ജബ്ബാറലി, എസ്.എം. എസ്. മുജീബ് റഹ്മാൻ, സിബിഎസ്ഇ ബോർഡ് ചെയർമാൻ ഡോ. കെ പി അബൂബക്കർ എന്നിവരെയും ആദരിക്കും.
എംഎൽഎ മാരായ ഷാഫി പറമ്പിൽ, എ പ്രഭാകരൻ, ടി വി ഇബ്രാഹിം, മുഹമ്മദ് മുഹ്സിൻ, പി പി സുമോദ്, കെ ഡി പ്രസേനൻ, അഡ്വ. കെ പ്രേംകുമാർ, ജില്ലാ പഞ്ചായത്ത് പ്രസിഡൻറ് കെ.ബിനുമോൾ സ്വരലയ പ്രസിഡൻറ് ടി ആർ അജയൻ എന്നിവർ പ്രസംഗിക്കും. തുടർന്ന് ഡോക്ടർ ഫസൽ ഗഫൂർ അവതരിപ്പിക്കുന്ന റാഫി-കിഷോർ ഗാന വിരുന്നും അരങ്ങേറും.
പത്രസമ്മേളനത്തിൽ സംഘാടകരായ എംഇഎസ് പാലക്കാട് ജില്ലാ കമ്മിറ്റിയുടെ പ്രതിനിധികളായി എംഇഎസ് പാലക്കാട് ജില്ലാ വൈസ് പ്രസിഡൻറ് എസ്. എ. മുഹമ്മദ് യൂസഫ്, ജില്ലാ സെക്രട്ടറി എ സൈദ് താജുദ്ദീൻ, ട്രഷറർ കെ പി അക്ബർ, ജോയിൻറ് സെക്രട്ടറി ജെ. ആഷിഫ് എന്നിവർ പങ്കെടുത്തു.
