തപാലിൽ എത്തിയത് 7 കിലോ കഞ്ചാവ്; കൊല്ലങ്കോട്ട് സഹോദരങ്ങൾ എക്സൈസ് പിടിയിൽ
കൊല്ലങ്കോട്: മേഘാലയയിൽ നിന്ന് തപാൽ പാഴ്സൽ വഴി കടത്താൻ ശ്രമിച്ച 7.34 കിലോഗ്രാം കഞ്ചാവുമായി രണ്ട് യുവാക്കളെ എക്സൈസ് പിടികൂടി. കൊല്ലങ്കോട് തെക്കേ പാവടി ശ്രീനിവാസിൽ ആർ. സഞ്ജയ് (22), ആർ. രാഹുൽ (26) എന്നീ സഹോദരങ്ങളെയാണ് ചിറ്റൂർ എക്സൈസ് സർക്കിൾ ഇൻസ്പെക്ടർ എസ്. സമീർ, കൊല്ലങ്കോട് ഇൻസ്പെക്ടറുടെ ചുമതലയുള്ള കെ. റിവർദാസ് എന്നിവരുടെ നേതൃത്വത്തിലുള്ള സംഘം അറസ്റ്റ് ചെയ്തത്. ബുധനാഴ്ച ഉച്ചയോടെ കൊല്ലങ്കോട് പ്രധാന തപാലോഫീസിൽ സഞ്ജയിന്റെ വിലാസത്തിൽ എത്തിയ പാഴ്സൽ കൈപ്പറ്റി പുറത്തിറങ്ങുമ്പോഴാണ് മഫ്തിയിലുണ്ടായിരുന്ന എക്സൈസ് സംഘം ഇവരെ പിടികൂടിയത്. പാഴ്സലിനെക്കുറിച്ച് സംശയം തോന്നിയ തപാലധികൃതർ നേരത്തെ തന്നെ എക്സൈസിനെ വിവരം അറിയിച്ചിരുന്നു. ഓരോ കിലോ വീതമുള്ള പായ്ക്കറ്റുകളായാണ് കഞ്ചാവ് സൂക്ഷിച്ചിരുന്നത്. പ്രദേശത്തെ ഒരു മൊത്തവിൽപ്പനക്കാരന് വേണ്ടിയാണ് ലഹരി എത്തിച്ചതെന്ന് പ്രതികൾ മൊഴി നൽകിയിട്ടുണ്ട്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.
