ഗർഭിണിയായ യുവതി തൂങ്ങി മരിച്ച സംഭവം; ഗാർഹിക പീഡനത്തിന് മണ്ണാർക്കാട് പോലീസ് കേസെടുത്തു.
മണ്ണാർക്കാട്: മരിച്ച യുവതിയുടെ മാതാപിതാക്കളായ മണ്ണാർക്കാട് ചങ്ങലീരി തെക്കുംപാടത്ത് അബ്ബാസിൻ്റേയും ഭാര്യ ഉബൈസയുടേയും മൊഴി രേഖപ്പെടുത്തുന്നതിന്റെ അടിസ്ഥാനത്തിലാണ് ഭർത്താവിനും വീട്ടുകാർക്കുമെതിരെ ഗാർഹിക പീഡനത്തിന് മണ്ണാർക്കാട് പോലീസ് കേസെടുത്തിരിക്കുന്നത്. വിശദമായ അന്വേഷണത്തിനു ശേഷം സ്ത്രീധന നിരോധന നിയമപ്രകാരം കേസെടുക്കുമെന്ന് ഡി വൈ എസ് പി,വി എ കൃഷ്ണദാസ് പറഞ്ഞു.
കഴിഞ്ഞ ഞായറാഴ്ച വൈകുന്നേരത്തോടെയാണ് റുസ്നിയ ജെബി(22)നെ തന്റെ വീടിനകത്തെ മുറിയിൽ തൂങ്ങി മരിച്ചതായി വീട്ടുകാർ കണ്ടത്. മരണം സ്ത്രീധനത്തെ ചൊല്ലിയുണ്ടായ നിരന്തരമായ പീഡനത്തെ തുടർന്നാണെന്നാണ് യുവതിയുടെ കുടുംബം പറയുന്നത്.
മരിക്കുന്നതിന് തൊട്ട് മുൻപ് ഭർത്താവ് മുസ്തഫ റുസ്നിയ ജെബിനെ കാണാൻ എത്തിയിരുന്നതായും തുടർന്നായിരുന്നു മരണമെന്നും യുവതിയുടെ ബന്ധുക്കൾ പറഞ്ഞു. സംഭവത്തിൽ സമഗ്ര അന്വേഷണം ആവശ്യപ്പെട്ട് യുവതിയുടെ കുടുംബത്തോടൊപ്പം നാട്ടുകാരും രംഗത്ത് വന്നിട്ടുണ്ട്.