പാലക്കാട് മുൻസിപ്പാലിറ്റിയിൽ ‘ജയ് ശ്രീറാം’ ഫ്ലെക്സ് ഉയർത്തിയ ബി.ജെ.പി പ്രവർത്തകർക്കെതിരെ കേസെടുക്കണം: വെൽഫെയർ പാർട്ടി
പാലക്കാട്: മുൻസിപ്പാലിറ്റിയിലെ വിജയാഘോഷത്തിനിടെ കെട്ടിടത്തിന് മുകളിൽ കയറി ബി.ജെ.പി പ്രവർത്തകർ ജയ് ശ്രീറാം ഫ്ലെക്സ് ഉയർത്തിയത് സമൂഹത്തിൽ വർഗീയ ചേരിതിരിവ് ഉണ്ടാക്കാനുള്ള ശ്രമങ്ങളുടെ ഭാഗമാണെന്നും സംഭവത്തിൽ ഉടനടി കേസെടുത്ത് പിന്നിൽ പ്രവർത്തിച്ചവരെ അറസ്റ്റ് ചെയ്യണമെന്നും വെൽഫെയർ പാർട്ടി ജില്ല പ്രസിഡൻ്റ് പി.മോഹൻദാസ് പ്രസ്താവനയിൽ പറഞ്ഞു.പാലക്കാട് കേരളത്തിൻ്റെ ഗുജറാത്ത് ആണെന്നുള്ള ബി.ജെ.പി വക്താവിൻ്റെ പ്രസ്താവന കൂടി വന്നതോടെ സംഭവം നേതൃത്വത്തിൻ്റെ അറിവോടെയാണെന്ന് വ്യക്തമായിരിക്കുകയാണ്. തങ്ങളുടെ സങ്കുചിത രാഷ്ട്രീയത്തിനായി സർക്കാർ സ്ഥാപനത്തെ ദുരുപയോഗിച്ച പാലക്കാട്ടെ ബി.ജെ.പി നേതൃത്വം ജനങ്ങളോട് മാപ്പ് പറയണം.ബി.ജെ.പി ഭരണ സമിതിയുടെ വർഗീയ നിലപാടുകൾക്കെതിരെ നഗരസഭയിലെ വെൽഫെയർ പാർട്ടി പ്രതിനിധി ശക്തമായി നിലകൊള്ളുമെന്നും അദ്ദേഹം പറഞ്ഞു.