വിദേശമദ്യവു വന്ന ലോറി പാടത്തേക്ക് മറിഞ്ഞു
കൊല്ലങ്കോട്: തിരുവനന്തപുരത്തേക്ക് പോകുകയായിരുന്ന ലോറി കൊല്ലങ്കോടിനടുത്ത് നെടുമണിയിൽ വയലിലേക്ക് മറിഞ്ഞു. അപകടത്തിൽ ലോറിഡ്രൈവർ കാവശ്ശേരി ഇരട്ടക്കുളം ഇടത്തിൽ കോളനി റഹീന മൻസിലിൽ കബീറിന് (50) പരിക്കേറ്റു. കബീർ കൊല്ലങ്കോട്ടെ സ്വകാര്യ ആശുപത്രിയിൽ ചികിത്സതേടി. മീങ്കരയിലെ സ്വകാര്യ ഡിസ്റ്റിലറിയിൽനിന്ന് വിദേശമദ്യം കയറ്റിവന്ന ലോറിയാണ് അപകടത്തിൽപ്പെട്ടത്.
മംഗലം-ഗോവിന്ദാപുരം സംസ്ഥാനപാതയിൽ അപകടം. കൊല്ലങ്കോട് ഭാഗത്തുനിന്ന് ഗോവിന്ദാപുരം ഭാഗത്തേക്ക് പോകുകയായിരുന്ന ലോറിയെ മറികടന്ന് മറ്റൊരു വാഹനം അപ്രതീക്ഷിതമായി വലതുവശത്തുകൂടെ കയറിവന്നപ്പോൾ നിയന്ത്രണം തെറ്റിയാണ് അപകടമുണ്ടായതെന്ന് കബീർ പറഞ്ഞു. സംഭവസമയം ഇദ്ദേഹം മാത്രമാണ് ലോറിയിലുണ്ടായിരുന്നത്.
റോഡരികിലുള്ള നെൽവയലിലെ ചേറുനിറഞ്ഞ കണ്ടത്തിലേക്കാണ് ലോറി മറിഞ്ഞത്. കൊല്ലങ്കോട് പോലീസും എക്സൈസ് ജീവനക്കാരും സ്ഥലത്തെത്തി സ്ഥിതിഗതികൾ വിലയിരുത്തുകയും ലോറിയിലെ മദ്യത്തിന് സംരക്ഷണമേർപ്പെടുത്തുകയുംചെയ്തു.
മദ്യലോറി മറിഞ്ഞെന്ന വാർത്ത പരന്നതോടെ നിരവധി ആളുകളും സ്ഥലത്തെത്തി. അപകടത്തിൽപെട്ട ലോറിയിലെ മദ്യം മുഴുവൻ മറ്റൊരു ലോറിയിലേക്ക് മാറ്റാനുള്ള നടപടി സ്വീകരിച്ചിട്ടുണ്ടെന്നും ഇത് പൂർത്തിയായാൽ മാത്രമേ എത്രനഷ്ടമുണ്ടായിട്ടുണ്ടെന്ന് കണക്കാക്കാൻ കഴിയുകയുള്ളൂവെന്നും എക്സൈസ് ജീവനക്കാർ പറഞ്ഞു.
