മംഗലം അണക്കെട്ടിൽ ബോട്ട് ഡ്രൈവർ മുങ്ങി മരിച്ചനിലയിൽ
വടക്കഞ്ചേരി
മംഗലം അണക്കെട്ടിൽ ചെളി നീക്കാനെത്തിയ ബോട്ടിന്റെ ഡ്രൈവർ മുങ്ങി മരിച്ച നിലയിൽ. എറണാകുളം മാലിപ്പുറം വളപ്പ് ബീച്ച് ചെത്തിപ്പറമ്പ് ഉണ്ണിക്കൃഷ്ണൻ (60) ആണ് മരിച്ചത്. തിങ്കളാഴ്ച രാത്രി എട്ടിനാണ് മൃതദേഹം കണ്ടെത്തിയത്.
എറണാകുളത്തുനിന്ന് മകൻ ഫോൺ വിളിച്ചിട്ട് എടുക്കാത്തതിനെത്തുടർന്ന് കൂടെ ജോലിചെയ്യുന്നവരെ വിവരമറിയിച്ചു. തുടർന്ന് തൊഴിലാളികൾ നടത്തിയ തെരച്ചിലിലാണ് മൃതദേഹം കണ്ടെത്തിയത്. ബോട്ട് നിർത്തിയിട്ടതിന് സമീപം ചെരുപ്പ് കണ്ടെത്തി. തുടർന്ന് നടത്തിയ തെരച്ചിലിൽ മൃതദേഹവും കണ്ടെത്തി. ബോട്ടിൽനിന്ന് വീണ് മരിച്ചതാകാമെന്നാണ് നിഗമനം.
മംഗലംഡാം പൊലീസ് സ്ഥലത്തെത്തി. മൃതദേഹം ആലത്തൂർ താലൂക്ക് ആശുപത്രി മോർച്ചറിയിലേക്ക് മാറ്റി. മൂന്ന് മാസംമുമ്പാണ് ഡാമിലെ ചെളിനീക്കുന്ന ബോട്ടുമായി ഉണ്ണിക്കൃഷ്ണൻ മംഗലംഡാമിലെത്തിയത്. ഭാര്യ: ഗിരിജ. മക്കൾ: ജിതിൻ, നിഥിൻ. മരുമക്കൾ: മൗഷ്മി, റോഷ്നി.
