കാഞ്ഞിരപ്പുഴയില് ബിവറേജസ് ഔട്ട്ലറ്റിലെ പണവുമായി മുങ്ങിയ ജീവനക്കാരന് അറസ്റ്റില് .
ആലത്തൂര് സ്വദേശി ഗിരീഷാണ് അറസ്റ്റിലായിരിക്കുന്നത്. മുപ്പത്തൊന്നേകാല് ലക്ഷം രൂപയുമായാണ് ഇയാള് മുങ്ങിയിരുന്നത്. പ്രതിയില് നിന്നും 29.5 ലക്ഷം രൂപ കണ്ടെത്തിയതായി പോലീസ് അറിയിച്ചു.
പാലക്കാട് കാഞ്ഞിരപ്പുഴയില് ബിവറേജസ് ഔട് ലെറ്റിലെ കളക്ഷന് തുകയുമായാണ് ജീവനക്കാരനായ ഗിരീഷ് മുങ്ങിയത്. ഒക്ടോബര് 21 മുതല് 24 വരെയുള്ള നാലു ദിവസത്തെ കളക്ഷന് തുകയായ 31, 25, 240 രൂപയുമായാണ് ഇയാള് കടന്നുകളഞ്ഞത്. കഴിഞ്ഞ നാലു ദിവസവും ബേങ്ക് അവധിയായതിനാല് പണം അടക്കാന് കഴിഞ്ഞിരുന്നില്ല. ഈ പണം ചിറക്കല്പ്പടിയിലെ എസ്ബിഐ ശാഖയില് അടക്കാനായി ഷോപ്പ് മാനേജര് കൊടുത്തു വിട്ടപ്പോഴാണ് ഗിരീഷ് പണവുമായി മുങ്ങിയത്.
സാമ്ബത്തിക ബുദ്ധിമുട്ടുകളുണ്ടെന്നും പോവുകയാണെന്നും വ്യക്തമാക്കിയുള്ള സന്ദേശം ഷോപ്പ് മാനേജര്ക്ക് അയച്ച ശേഷമാണ് മുങ്ങിയത്. രണ്ടു വര്ഷത്തിലേറെയായി കാഞ്ഞിരം ഷോപ്പിലെ ജീവനക്കാരനാണ് ഗിരീഷ്. സിസിടിവി ദൃശ്യങ്ങളും മറ്റും കേന്ദ്രീകരിച്ച് നടത്തിയ അന്വേഷണത്തിലാണ് ഇയാള് പോലീസിന്റെ പിടിയിലാകുന്നത്.
