ബിജെപി കൗണ്സിലര് അപമാനിക്കുകയും ഭീഷണിപ്പെടുത്തിയെന്നും ആരോപിച്ച് പാര്ട്ടി വനിതാ കൗണ്സിലര്മാര് പ്രധാനമന്ത്രി നരേന്ദ്രമോദിക്കും കേന്ദ്ര ആഭ്യന്തര മന്ത്രി അമിത്ഷാക്കും പരാതി നല്കി.പാലക്കാട് നഗരസഭ മുന് ചെയര്പേഴ്സണ് കൂടിയായ പ്രമീള ശശിധരന്, ബിജെപി സംസ്ഥാന ജനറല് സെക്രട്ടരി സി കൃഷ്ണകുമാറിന്റെ ഭാര്യ മിനി കൃഷ്ണകുമാര് എന്നിവരാണ് പരാതി നല്കിയത്. ബിജെപി പാലക്കാട് മണ്ഡലം പ്രസിഡണ്ട് കൂടിയായ പി സ്മിതേഷിനെതിരെയാണ് പരാതി. ആഗസ്റ്റ് 26 ന് ചേര്ന്ന പാര്ലമെന്ററി കമ്മിറ്റി യോഗത്തിലാണ് പരാതിക്കാസ്പദമായ സംഭവം നടന്നത്.
സംഭവം സംസ്ഥാന നേതൃത്വത്തെ അറിയിച്ചിരുന്നെങ്കിലും നടപടി ഉണ്ടായിട്ടില്ലെന്ന് പരാതിക്കാര് വ്യക്തമാക്കി. പിന്നാലെയാണ് ദേശീയ നേതൃത്വത്തിന് കത്തയച്ചത്. ബിജെപി സെക്രട്ടറി എം ഗണേഷിനും പ്രസിഡണ്ട് കെ സുരേന്ദ്രനും പരാതി നല്കിയെന്നും നടപടിയില്ലെന്നും ദേശീയ നേതൃത്വത്തിനയച്ച് കത്തില് പ്രത്യേകം പരാമര്ശമുണ്ട്.
എന്നാല് സ്മിതേഷ് ആരോപണം നിഷേധിച്ചു. അതേസമയം പരാതി ലഭിച്ചയുടന് സംസ്ഥാന ബിജെപി നേതൃത്വം ഇതില് ഇടപെട്ടിട്ടുണ്ടെന്നും സ്മിതേഷ് പരാതിക്കാരോട് ഖേദം പ്രകടിപ്പിച്ചെന്നും ബിജെപി സംസ്ഥാന നേതാക്കളെ ഉദ്ധരിച്ച് ഇന്ത്യന് എക്സ്പ്രസ് റിപ്പോര്ട്ട് ചെയ്തു. ഖേദപ്രകടനത്തില് പ്രശ്നം പരിഹരിക്കാന് കഴിയില്ലെന്നും ആരോപണവിധേയനെതിരെ നടപടിയെടുക്കണമെന്നുമാണ് പരാതിക്കാരുടെ ആവശ്യം.
