പാചകവാതകവില വർധന പിൻവലിക്കുക, ഭക്ഷ്യ ഉൽപ്പന്നങ്ങൾക്ക് ചുമത്തിയ ജിഎസ്ടി പിൻവലിക്കുക, തൊഴിലുറപ്പ് പദ്ധതി അട്ടിമറിക്കാനുള്ള ശ്രമം ഉപേക്ഷിക്കുക തുടങ്ങി 28 പ്രധാന മുദ്രാവാക്യമുയർത്തികൊണ്ട് കേന്ദ്രസർക്കാർ നയങ്ങൾക്കെതിരെ സംയുക്ത കർഷകത്തൊഴിലാളി സംഘടനകളുടെ നേതൃത്വത്തിൽ പാലക്കാട് ഹെഡ് പോസ്റ്റ് ഓഫീസിലേക്ക് മാർച്ച് നടത്തി.
കെഎസ്കെടിയു സംസ്ഥാന ട്രഷറർ സി ബി ദേവദർശനൻ ഉദ്ഘാടനം ചെയ്തു. ബികെഎംയു ജില്ലാ പ്രസിഡന്റ് വാസുദേവൻ തെന്നിലാപുരം അധ്യക്ഷനായി. കെഎസ്കെടിയു ജില്ലാ സെക്രട്ടറി ആർ ചിന്നക്കുട്ടൻ, ബികെഎംയു ജില്ലാ സെക്രട്ടറി സിദ്ധാർഥൻ, കെഎസ്കെടിയു ജില്ലാ പ്രസിഡന്റ് ടി എൻ കണ്ടമുത്തൻ, എം ടി ജയപ്രകാശ് എന്നിവർ സംസാരിച്ചു.