ആലത്തൂർ പാടൂരിന് സമീപം ലോറിക്കടിയിലേക്ക് സ്കൂട്ടർ മറിഞ്ഞ് യുവാവിന് ദാരുണാന്ത്യം

പാലക്കാട്:ആലത്തൂർപാടൂരിന് സമീപം ശനിയാഴ്ച രാവിലെയുണ്ടായ ദാരുണമായ വാഹനാപകടത്തിൽ യുവാവ് മരിച്ചു. പുതുക്കോട് തിരുവട പൊറ്റ സ്വദേശി ഹക്കിമിൻ്റെ മകൻ അനസ് (22) ആണ് മരിച്ചത്. സ്കൂട്ടറിൽ ഒപ്പമുണ്ടായിരുന്ന പഴയന്നൂർ വേങ്ങന്നൂർ പരുത്തിപ്ര സ്വദേശി റാഷിദിന് അപകടത്തിൽ പരിക്കേറ്റു.
ശനിയാഴ്ച രാവിലെ 9:30-ഓടെയായിരുന്നു അപകടം സംഭവിച്ചത്. ആലത്തൂർ ഭാഗത്തേക്ക് സ്കൂട്ടറിൽ വരികയായിരുന്നു ഇരുവരും. പാടൂരിന് സമീപം വെച്ച് നിയന്ത്രണം വിട്ട സ്കൂട്ടർ റോഡിലേക്ക് മറിയുകയും, അതേസമയം എതിർദിശയിൽ നിന്ന് ഗ്യാസ് സിലിണ്ടറുകളുമായി വന്ന ലോറിക്കടിയിലേക്ക് ഇടിച്ചുകയറുകയുമായിരുന്നു. അപകടം നടന്ന ഉടൻ തന്നെ നാട്ടുകാരും യാത്രക്കാരും ചേർന്ന് ഇരുവരെയും ഇരട്ടകുളത്തെ സ്വകാര്യ ആശുപത്രിയിൽ എത്തിച്ചെങ്കിലും അനസിൻ്റെ ജീവൻ രക്ഷിക്കാനായില്ല. സംഭവത്തിൽ ആലത്തൂർ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പരിക്കേറ്റ റാഷിദ് നിലവിൽ ചികിത്സയിലാണ്.